1.mai-helga 2010 var eg med som guide på den årlege skituren til Statoil Bergen si turgruppe til Sognefjellet. Tre toppar over 2000 meter fekk me gått i varierande ver og føre.  Fredagen var det plussgrader og skodde. Laurdagen var det 10  minusgrader og nysnø og sundag blå himmel, stille og sol. Ja slik skiftar forholda i høgfjellet.

Dyrhaugsryggen Det er 1100 m stigning frå Turtagrø til toppen av Dyrhaugsryggen.  Det enklaste er å fylja løypa til "Tinderittet" som går frå Turtagrø Hotell. Både i 2009 og 2010 vart Tinderittet avlyst grunna lite snø.Dyrhaugsryggen er brei og enkel å gå på ski på med bratte kneikar og rolegare parti innimellom. Du brukar ca 2-3 timar opp til den såkalla  turisttoppen før Nordre Dyrhaugstind. Her smalnar eggen til og du treng isøks og stegjern og må parkera skia. På fine dagar er det storslått utsikt, særleg mot Skagastølstindane.

Fakta om turen:  2-3 timar opp og 1 time ned att. Fin nybyrjartur for dei som vil prøva bratte skitoppar.

På Storebjørn Smørstabbreen på Sognefjellet er den største breen i Jotunheimen. Rundt den ligg det mange fine toppar som er greie å bestiga på ski i mai.Frå Krossbu på 1250 moh. set du kursen austover mot Leirbreeen. Du får då fine toppar på venstre hand med Store Smørstabbtind, Kniven, Sokse og Geite. Alle toppane som omkransar breen er over 2000 m. For å komma til Storebjørn frå Leirbreen, må me passera gjennom Bjørneskaret og så vidare ein kneik på ca 300 høgdemeter opp på  sjølve Storebjørn.

Etter ca 3 timar står så ein glad og sprek gjeng på toppen av Storebjørn 2222 moh., med storslått utsikt over breen og toppar i alle retningar. Bakerst i skodda stikk Hurrungane opp og til høgre Fanaråken. Nedunder oss ligg breen med Store Gravdalstind bak og Søre Smørstabbtindane. Desse er også fine skitoppar med utgangspunkt frå Krossbu. Føret er fint og gjev herlege svingar i 300 høgdemeter. Så er det på med fellene att og oppstiginga til Bjørneskaret og så avslutningen med  herlege unnabakkar ned att til Krossbu.

Vestre Austanbotntind

I 2010 var det lite snø i fjellet og alt 2. mai var vegen open mellom Turtagrø og Øvre Årdal. Dette opna for andre fine turar.   Store Soleibotntind lokkar, men det var så lite snø mot toppen og isete så det slo me frå oss. Vestre Austanbotntind låg derimot klar for eit besøk.

Frå Berdalsbandet på 1200 moh. set me kursen oppover med flott sol og blå himmel over oss. Terrenget liknar litt på Dyrhaugsryggen med bratte kneikar og slakare parti innimellom. Det er  800 m stigning og litt lettare enn Dyhaugsryggen. Utsikta er fin mot Austanbotnmassivet i aust og formidabel mot Ringstind og Store Skagastølstind i nord.  Mot slutten vert det brattare opp mot 1900 moh.  Vidare oppover mot Vestre Austanbotntind vert det bratt og luftig  her tek dei alle fleste av seg skia. Så er det opp til kvar einskild kor langt opp mot Vestre Austanbotntind på 2099 moh. ein torer å gå.  Dei som vil heilt opp må ha med seg stegjern og isøks.  Opp til Store Austabotntind er  uaktuelt med ski, og det er ein seriøs sak på vinterstid som krev  spesielle kunnskapar. Då me er litt over 1900 moh ser me brått to personar som står like under Vestre Austanbotntind. Det er ingen spor framføre oss, så dei har nok komme opp nordrenna. Dei byrjar så å skri ned på sørsida og  ned i Vetle Austanbotnen.  Det er bratt, men det går bra. 3 personar i vår gruppe vil prøva det samme og dei  skrir ned i Store Austanbotnen og fylgjer lange elva nedover til stølen Murane. Her plukkar me dei opp på bilvegen mot Årdal. Me andre tok "normalvegen" ned att.