Trollheimen
Mange omtalar berre fjellplatået rundt Blåhø og Folldalen som Trollheimen,
men i vidaste forstand avgrensar Trollheimen av Surnadalen og Rindal i
nord, Orkdalen og Dovrebanen/E6 i aust, Sunndalen og Oppdal i sør og
fjordane i vest. Landskapet i øst er prega av rolege og mjuke linjer,
men etter kvart som vi kjem vestover blir det stadig villere, meir
alpint og monumentalt inne i Innerdalen.

Trondhjems Turistforening (TTs) sine hytter i Trollheimen er blant fjellvandrarar
flest kjent for sin unike arkitektur og sitt særprega miljø. Hyttene
har grovt tømmer i veggane. Trollheimen var sannsynlegvis det området i
landet som først smelta etter istida, og funn som er opptil 9 000 år
gamle tyder på at det har budd menneske i området sidan steinalderen.
Blåhø med sine 1668 moh. er det høgaste fjellet i den nordaustlege
enden av Trollheimen.

Slakt innover mot Soria Moria
Frå  Skardbakkane på 740 moh. er det ein liten kneik opp før terrenget legg
seg slakt innover. Snart får eg auga på dagens mål Blåhø som eit ”Soria
Moria” ca 15 km i luftlinje der framme. Bakover mot aust ligg dei flate
myrane på Nerskogen. Dette er ei høgfjells- og jordbruksbygd med små
hyttekoloniar og gardar spreidd utover. Det er 11. April 2009 og påske.
Snøen er grautete og heldigvis går det spor innover. Det tek eit par
timar før eg er ved porten mellom Tyrikvamfjellet og Høghø og eg ser
Okla på andre sida av Gjevilvatnet. Toppen av Blåhø ligg enno fjernt
unna. Eg må ein kneik ned i Gjørdølsdalen før det går jamnt oppover i
kanten av Falkfangerhøa. Her er det fastmerking opp til det smale
passet i Svarthamrane. No ser eg sjølve eggen som er ca 3 km lang og
det skumle toppstupet av Blåhø som stig ca 700 m opp frå Bløhøtjørna.
Den massive veggen er blå og har gjeve namnet til toppen. Eg skrir ned
på den vesle Svarttjørna og tek ein liten pause. Her låg inngangen til
den berømte isgrotta Speilsalen som raste saman hausten 2007.

Blåhø som eit ”Soria Moria” langt der framme. Frå porten mellom Tyrikvamfjellet og Høghø ser ein Okla på andre sida av Gjevilvatnet

Mange vil på toppen, men fyrst litt mat. Toppeggen på Blåhø med Snøhetta på Dovre i bakgrunn


Til topps
Så  byrjar den bratte oppstiginga til toppen. Då tek eg på feller. Etter
kvart som høgda vert teke, vert utsikta formidabel over Trollheimen sin
fjellverden. Snota stikk seg fram mot nord og når eg kjem opp på
toppflata, opnar også ei fjellverd seg mot sør. Ja utsikta er vid heilt
mot Innerdalen og til Dovrefjell. Den karakteristiske toppvarden med
minneplata står heilt på kanten av det ca 700 m høge stupet med
hengeskavlar utover. Pass på her oppe. Under føtene dine mot sør ligg
Gjevilvatnet. På toppen møter eg 11 åringen og trønderen Simen Smetbak
Eriksen og mora Beate Smetbak. Dei kjem frå Skardvatnet slik som meg.
Det er finver, men kraftig vind, så det er uråd å ta pause på toppen.

På nedturen møte me fleire folk som er på veg oppover. Returen går kjapt
ned att til vesle Svarttjørna, så opp på Svarhamrane og lange bakkar
nedover under Høghøa att. Det er seigt utover den slake dalen før eg er
attende ved Skardvatnet. Langt bak meg ligg no Blåhø sin
karakteristiske profil.

Så ber det bratt oppover mot toppen
Endeleg på toppen av Blåhø på 1668 moh. Snota i bakgrunnen.

Varden på toppen av Blåhø.  Høge stup bratt ned i front. Gjevilvatnet i bakgrunnen.

På veg ned når andre er på veg opp. Trollhetta i bakgrunnen.

Lange flatar attende mot Blåhø med Gjevilvasskammane til venstre


Fakta om turen til Blåhø
Frå  parkeringsplassen i Skardbakkane like før Nerskogen er kortaste veg på
vinterstid. Ein kan også gå på ski frå Gjevilvassosen til
Gjevilvasshytta og på ettervinteren fylja kvista løypa derifrå til
foten av Blåhø. Du kan ta toget til Oppdal og så ta taxi ca 25 minutt
til Skardbakkane eller Osen. "Trekanten i Trollheimen", ruta mellom
Gjevilvasshytta, Jøldalshytta og Trollheimshytta blir kvista til påske.
Det er DNT-kvisting med permanent staka midtparti over Svarthamrane,
like ved foten av Blåhø.

Tid Skardbakkane parkering til
Blåhø 15 km og 3-4 timars gangtid. Slakt terreng i starten , men så
stigning siste timen mot toppen. Ca 900 høgdemeter. Retur ca 2 timar .
Finverstur, lang dagstur samla tid med pause, ca 7-8 timar.
Kart Trollheimen 1:50 000 og Trollheimen 1:75 000.
Meir informasjon: På nettsidene til Trondjems Turistforening

Skiutstyr
Eg brukte Åsnes Ingstad med klister i starten og så kortfelle mot toppen.

GPS
Kart: viser kartutsnitt med turrute
Datafil: last ned fil (komprimert fil - zip)