På Smørstabb-breen på Sognefjellet i Jotunheimen ligg der mange fine toppar med artige namn etter dyr og kjøkkenbestikk som; kalven, geita, kniven, saksa, skeie osv. Du startar frå Krossbu på ca 1250 moh. og legg vegen innover breen for å oppsøkja toppane, som er over 2000 m. Dette er ein platåbre med slake flater oppå med lite sprekker, men oppsprukke brefall som Bøverbreen der det er bratt nedover.
Området er fint til skiturar når Sognefjellsvegen er opna i slutten av april. Utover Vår/sommar kjem breen meir fram og dermed også farlege sprekker. Vurder allitd behov for breutstyr. Snakk med Krossbu turisthytte før du går på tur.
Bildet viser toppen av Storebjørn sin karakteristiske "bjørneprofil", hovudet til ein bjørn med øyrer som stikk ut. Den siste bakken er 300 høgdemeter på brat snødekt breplate. i øvre del kjem det fram ei stor sprekk utover sommaren. Då treng ein tau for å komma til toppen. På bildet ser du 4 personar og ein hund på veg mot toppen.
Frå Krossbu på 1250 moh. set du kursen austover mot Leirbreeen. Her er kvista og trygg løype frå påsketider. Den 30. april 2009, la 12 personar frå turgruppa i Statoil Bergen i veg mot Storebjørn.
Du tek av frå kvisteløypa og set kursen austover på Leirbreen. Du får då fine toppar på venstre hand med Store Smørstabbtind, Kniven og Geite. Alle toppane som omkransar breen er over 2000 m.
For å komma til Storebjørn frå Leirbreen, må du passera Bjørneskaret som ligg på 2020 moh mellom toppane Bjørnungen og Sokse. Skaret er ca 150 m breitt og ligg mellom Bjørnungen og Sokse. Du må ned ein bakke på ca 100 høgdemeter til 1920 moh. Her kan det vera høg skavl inn mot Bjørnungen, så du må ha sikt eller vera kjend for å gå ned. Frå Krossbu brukar du 2 timar på dei 6 km hit. Du brukar så 1 time vidare til toppen. Frå botnen av skardet får du ein kort flate bortover til starten av den bratte stiginga til toppen av Storebjørn. På bildet ventar me nede i skaret for at skodda skal letta.
På veg oppover mot Storebjørn kjem me over skodda og Veslebjørn, Skeie og Kalven kjem fram bak oss.
Så skimtar me høgre øyre av bjørnen og fortoppen gjennom skodda på veg i den bratte bakken mot toppen.
Det er eit litt slakare parti før ein får den siste bratte kneiken. Vanlegvis kan du gå på ski heilt opp til topps.
Ein glad og sprek gjeng i Statoil si turgruppe på toppen av Storebjørn 2222 moh. med storslått utsikt over breen og toppar i alle retningar. Bakerst i skodda Hurrungane og til høgre Fanaråken.
Utsikt over Store Gravdalstind bak og Søre Smørstabbtindane framme. Fine skitoppar frå Krossbu.
Så bers det ned att den fantastiske snøbakken på 300 høgdemeter i fint svingføre.
Toppen i bakgrunnen og Lars Grøteide i fin telemarksving.
Herlege svingar i snøen fortel om mykje moro på veg ned.
Så var me i botnen att og på veg oppover mot Bjørneskardet. I bakgrunnen 4 andre som kom frå Leirdalen og er på veg mot toppen.
Så er me på veg op att mot Bjørneskaret. Sokse stig opp rett imot.Tiil venstre er Bjørnungen.
Oppe i Bjørneskaret att med Storebjørn ruvande bak. Til høgre Bjørnungen.
Nokre av turfylgjet vil på Store Smørstabbtind (toppen til venstre) (Kniven midt i) og tek passasjen gjennom skardet mellom Geite og Kniven eller over Geite og ned på baksida til høgre i bildet.
På Geiti med frå venstre; Sokse, Storebjørn, Bjørnungen og Veslebjørn
Kniven i front der ein kan gå ned på høgre side over skavlkant (kan vera litt ekkel) eller i skar heilt inntil foten av Kniven. Opp i skaret og ned på Storbreen bak. Du kjem ikkje ned frå Geite i front, men må gå ned att på Leirbreen og rundt ho.
Ein liten skavl ned på nordsida (baksida) av Geite. Her er det baksolt og hardt . Det er lettare å gå gjennom skaret mellom Geiti og Kniven.
Nede på Storbreen med Sokse, Kniven og Store Smørstabbtind steilt til vers. Dette er ein enkel og grei veg rundt og opp på Store Smørstabbtind.
På veg opp den bratte bakken til Store Smørstabbtind. Dersom du er litt tøff tek du med skia heilt opp. Dei fleste set att skia ved den bratte bakken der du ser den øverste skiløparen på bildet. Toppen flatar inn etter denne bratte bakken. Turen opp hit vil dei fleste som er gode på ski klara.
Bjørnane sett frå Store Smørstabbtind. Bak Storebjørn, framme Bjørnungen og til høgre Bjørneggen og Veslebjørn.
På veg ned att med ski frå Store Smørstabbtind. Her er eit litt flatare parti før den bratte bakken, der dei fleste nok vil bera skia.
Nede att på Leirbreen i vakker kveldssol. Store Smørstabbtind til venstre og kalven til høgre.
På heimveg med Fanaråken og Steindaøsnosi i bakgrunnen
Attende på Sognefjellashytta der me bur. Herleg utsikt mot toppane på Smørstabbreen. Store Smørstabbtind til venstre, så Kniven, Geite, Sokse, Veslebjørn, Kalven og Storebjørn heilt til høgre.
Store Smørstabbtind til venstre, så Kniven og Geite. Her ser du tydeleg skaret mellom Kniven og Geite som du lett kan passera gjennom for å komma på baksida og opp på Store Smørstabbtind.
Herleg solnedgang og utsikt mot Hurrungane med frå v. Gjertvasstind, Styggedalstindane, Sentraltind og Storen
Rediger