Frå Ulvik køyrer du 15 minutt inn til Osa i Osafjorden. Herifrå går det ein
bratt, men fin asfaltert veg opp på Osafjellet, som tek ca 30 minutt å
køyre.

Berre turen opp hit er ei oppleving med avskurte fjell
etter istida og bratte dalar og stup. Vegen går opp til ca 1100 moh,
men det ligg snø i han til langt utpå sommaren.
Fylg vegen oppover
og ta skia fatt når du møter snøen i vegen. Vår tur her var den 16.
juni og me måtte parkera på 850 moh. Så fylgde me vegen vidare oppover
med nokre kutt undervegs.
Me gjekk rundt Kvitingavatnet då dette var
byrja å verta blått. Me brukte ca 2,5 timar opp i roleg tempo. Snøen
var fin, men ein kald nordavind gjorde det vinterleg. På toppen var det
minusgrader denne dagen.
Så var det jamn stigning ca 500 m opp til
den avrunda kuppeltoppen. Utsikta frå toppen er fin som på liknande
avrunda bretoppar med utsikt mot Hardangerfjorden, Hårteigen,
Vossafjella og Hardangerjøkulen.

Nedskriinga er verkeleg fin der
ein kan velja kor bratt ein vil ha det. Det tek berre ein time ned att
til bilen. Ei vakker kveldssol lyste opp dei bratte fjella, høge fossar
og nysprotte bjørk.

Skiutstyr:
Åsnes storetind og kort og langfelle

På snødekt veg frå ca 900 moh. med Vassfjøra sin steile topp i bakgrunnen.

Isen er ikkje lenger trygg så me må gå rundt Kvilingavatnet, der den "Blå lagune" er kome fram.

Siste oppstigninga mot Onen er typisk for ein bretopp med ein langdryg "kuppel" der ein ikkje ser sjølve toppen.

Så er endeleg toppvarden der.

Frå toppen. Hårteigen viser godt inne på Hardangervidda mot søraust.

Onen på 1621 moh.  med Hardangerfjorden i bakgrunnen

Fint nedrenn med Hardangerjøkulen i bakgrunnen mot nordaust

Liten skiløpar på veg nedover med det regulerte Langvatnet i bakgrunnen.

Fint nedrenn i smørmjuk snø.

Vår på Osafjellet er ei oppleving.