30 km fjellrygg
Fjellrekkja som vert kalla Raundalsryggen startar ved Selheim i Raundalen og strekkjer seg ca 30 km i luftlinje heilt opp mot Mjølfjell. Her ligg det 4 fjelltoppar på rekkje og rad med djupe skar imellom. Terrenget er vilt og bratt og ein må finna dei rette passasjane på vegen bortover. Dette er difor ein finverstur.
Utsikta er fantastisk og undervegs ser du Hardangerjøkulen, Folgefonna, Rosendalsalpane, Fresvikbreen, Bergsdalsfjella, Vossafjella, Kvitanosi, Hardangerfjorden og heilt inn i Hurrungane i Jotunheimen.
Når du tek toget gjennom Raundalen, fylgjer fjellrekkja deg på sørsida. Turen over Raundalsryggen er fin å gå i april-juni. Då er det ofte godt med snø og føret er fint med nattefrost og lange dagar. Dette er ein typisk tur med skifeller.

På veg opp frå Skiple i Raundalen som er grøn og vakker.

Horndalsnuten - vegvisar i det fjerne
Når du kjem frå vest mot Voss, ser du den markante toppen Horndalsnuten som ragar i det fjerne. Dette er krumtappen på Raundalsryggen. På sommaren i juni må du starta på nordsida av Horndalsnuten for å få godt med snø. Du køyrer til Skiple og tek bomveg/skogsveg til endes i ca 4 km til Horndalsbotnen. Her går du mot sør oppover Horndalsbruni. Me måtte bera skia i 20 minutt til kote 720 moh. Turen frå skogsvegen er den fyrste timen tung og bratt og det tek tilsaman ca 2 timar å ta dei 900 høgdemtrane opp til Horndalsnuten. Undervegs får du ei fantastisk utsikt og flott profil mot toppane Horndalsnuten og Skipadalsnuten med sine bratte stup imot deg. Når du nærmar deg toppen av Horndalsnuten får du ei nydeleg utsikt vidt omkring i Vossebygdene. Toppflata er skarpt avskore i bratte hengjeskavlar og stup mot Raundalen. Terrenget er litt slakkare mot Voss og Granvin. Utsikta er fantastisk. I nord om lag 80 km unna i luftlinje bryt kvasse tindar horisonten. Det er Jotunheimen som viser seg fram. Du kan sjå majesteten Store Skagastølstind mellom dei andre toppane i Hurrungane.

Flott profil undervegs med Horndalsnuten og Skipadalsnuten rett imot.

På toppen av Horndalsnuten 1464 m. Her ser ein ryggen vidare mot Skipadalsnuten i bakgrunnen.

Skipadalsnuten - taggete hestehals
Mot aust ser ein no neste topp Skipadalsnuten med eit skar imellom. Middels bratt og flott nedrenn 80 høgdemeter på 5 minutt og ein er i botnen av skaret. Så 150 m opp att på Skipadalsnuten sin taggete rygg. Her kan føret variera, men det er på denne tida lite snø på ryggen så dei fleste vil ta skia på sekken og gå til fots. Det er svært bratt mot Raundalen så hald mot sør. Dei tøffaste går både opp og ned her med ski på beina ved bra føre. Utsikta er fin der du ser Sørfjorden i Hardanger rett i sør. Toppen er ca 2 km lang. I fyrstninga vid, men smalnar inn mot aust. Ein kan fylgjer toppryggen på sørsida og får ein nydeleg telemarksbakke (Mindebakken lokalt namn) på ca 200 m ned i skaret. Ein kan også fylja toppryggen på nordsida mot Raundalen og komma ned ved naturleg passasje lenger mot nordaust.

Mindebakken med 200 m med flott nedrenn. Seldalnuten bak.

Seldalsnuten - med hengeskavl
Så er det på med fellene att og 150 m bratt opp på brei og fin rygg. Toppflata på Seldalsnuten er vid, men bratt ned mot Raundalen. Flott nedrenn på 200 m med dramatisk utsikt inn i den ville Trollabotn og Seldalsnuten sin karakteristiske hengeskavl slik som ein også har på Horndalsnuten. Dette er den smalaste passasjen ned og her må ein treffa rett mot nordaust for det er bratt på begge sider.

Ned langs Seldalsnuten sin spesielle skavl.

Olsskavlen  1000 m nedrenn
Fellene på att og 200 m opp. Bratt kneik fyrst, men terrenget legg seg fort. Toppen har brekalott og terrenget slakkar av til ei stor vid flate på over ein kilometer i alle retningar. Dette er det høgaste punktet på ryggen med 1575 m. Det er 3 vardar på toppflata, men den lengst mot sør er den høgaste. Du ser no rett på Vassfjøra sin steile front i aust. Ved godt føre står ein no framfor Voss sin flottaste nedoverbakke på ca 1000 m. Du fylgjer rett ned mot nord over Tungefjellet og kjem ned vest for Vollbotnvatnet. Den finaste nedskriinga er å ta mot vest før Tungefjellet slik at du kjem ned i den bratte og ville Trollabotnen og fylgjer så nedover Mysedalen. På begge traseane fylgjer du så sti/løype ned til bru over elva frå Vollbotnvatnet og så ca 1 km ned Raundalselva med ny bru og vidare til Voll der det er bilveg og lokaltoget stoggar.

Fakta om turen
Kartblad: Ulvik 1316 II
Fjellrygg som går mellom Voss og Mjølfjell langs Raundalen
Dette er ein finverstur. Det er vanskeleg å finna dei rette passasjane i dårleg ver. Ein kan bryta av og ta seg ned i dalen fleire stader dersom veret slår om.
Start for turen: På sommaren i juni må du starta på nordsida av Horndalsnuten for å få godt med snø. Du køyrer til Skiple og tek bomveg/skogsveg (kr 40) til endes i ca 4 km til Horndalsbotnen. Dersom du på førehand har med deg ein sykkel som du har lagt oppe ved vegen på Voll, så kan du lett henta bilen etterpå. Du får då 10 km på for det meste unnabakke på sykkel. Det tek 30 minutt.
Frå Skiple: Ca 30 km til Voll,
Ca 6-7 timars gangtid på ski, ca 1500 høgdemeter opp og det samme i nedfart.
Skiple (Horndalsbotnen skogsveg)-Horndalsnuten ca 2 timar,
Horndalsnuten- Skipadalsnuten ca 1 time
Skipadalsnuten-Seldalsnuten, ca 1 time
Seldalsnuten -Olsskalven ca 1 time
Olsskavlen til Vollbotn stasjon ca 1,5 time

Kommunikasjon: Tog, bil, taxi til/frå Voss.

Skiutstyr
Eg brukte Åsnes Vetletind og langfelle. Skia er breie og gav god flyt på mjuk ettermiddagssnø. Det var viktig med nyglida ski på det dårlege føret

GPS
Kart: viser kartutsnitt med turrute
Datafil: last ned fil (komprimert fil - zip)